Identidade

Ami Orden Relijiozu ida harii iha sékulu XVII husi Saun José Calasanz (1557-1648) no dedika-an ba evanjelizasaun liu husi edukasaun ba labarik sira no liuliu sira bé ki’ak. Tánba ne’e mak ami konsagra-an ho votu espesiál dahaat.

Saun José Calasanz, iha tinan 1948, Amu Papa Pio XII deklara nia nu’udar “Mahein Universál ba eskola Kristaun popular hotu iha mundu”, simu homenajen tán loke ona “eskola popular gratis ba dahuluk iha Europa” iha tinan 1597 (Von Pastor). Calasanz proklama direitu labarik sira nian ba edukasaun no kontinua luta ba direitu ida ne’e, tán ne’e mak ema haterus nia. Maibé nia susesu iha ninia objetivu hodi fó resposta ba dezafiu no nesesidade sira iha tempu ne’ebá nian.

Iha 1617 Calasanz harii Kongregasaun Paulina (tamba Amu Papa Paul V mak aprova) Clérigos Regulares dos Pobres da Mãe de Deus das Escolas Pias, ne’ebé ikus mai Amu Papa Gregorio XV hasa’e ba Orden Relijiozu iha 1621 ho naran atuál “Orden Skolápios”. Lalais de’it, Skolápios da’et ba fatin hotu iha Itália no Europa sentrál. Ohin loron Skolápios prezente iha kontinente haat (Europa, Asia, Afrika no Amérika). Ami relijiozu hamutuk 1.300 resin.

Akontesimentu inísiu ida ne’e la’o nafatin iha tempu naruk, durante tinan atus haat resin, too mai ita. Skolápios sempre harii eskola sira ne’ebé fó formasaun ba labarik sira atu sai ema ne’ebé nakloke, tulun-malu, komprometidu no fiar-na’in. Eskola sékulu XXI, iha ne’ebé ita hotu hola parte, bele hariku ita-an integralmente iha ita nia kompetensia hotu-hotu, hodi kontribui halo mudansa no halo di’ak liu-tan ita nia mundu, mundu ida bé humanu liu, fraternu liu, tuir Jesus nia Evanjellu.

Misaun ne’e ami la hala’o mesak. Ami fahe ho leigu rihun-atus resin no kongregasaun relijiozu feto no mane hosi Família Calasánsia nian.