Husi loron 9 too 13 fulan Dezembro tinan ida ne’e, Skolápios sira ho kolaborasaun husi Katekista sira organiza Akampamentu Adventu (Advent Camp) ho ninia tema: Growing Together in the Spirit of Advent, ba labarik sira husi tinan 10 too 13, iha Estasaun São José – Maquili, Paróquia Nossa Senhora de Fátima, Ataúro.
Atividade akampamentu ne’e hetan partisipasaun di’ak husi labarik 130. Advent Camp ninia objetivu mak atu lori labarik sira ba koko sabor tempu Adventu nian hodi prepara sira ba festa Natal Na’i Jesus nian ho dinámika hanesan tuir mai.
- Loron dahuluk dedika ba rejistrasaun no organizasaun.
- Loron da-2 too loron da-4, sira simu formasaun kona-ba Adventu, Anunsisaun no vizitasaun Mari aba Isabel; no ikus kona-ba Bibi-Atan sira-nia visita ba Kosok-Oan iha Belem. Atu hatan no hamoris formasaun ne’ebé sira simu, labarik sira fahe ba grupo 4 hodi visita Bebê, Inan isin-rua, no Avo. Iha sira-nia visita sira mos lori presente ne’ebé sira rasik mak sosa.
- Loron ikus, loron da-5, dedika ba preparasaun, Selebrasaun Eukaristia no fahe ksolok liu husi han-hamutuk, aprezentasaun dansa, toka, kanta, puizía no drama.
Atividade la’o ho susesu tebes ho kolaborasaun husi Joven voluntário, Katekista, kandidatu Skolápios sira no inan-aman sira. Agradese tebes ba ema hotu nia kolaborasaun. La haluha agradese mos ba labarik sira hotu ne’ebé lori fós kopu ida lorloron ba atividade ida ne’e. Sira aprende ona moris hamutuk, solidáriu no kolabora oinsá atu lori atividade ne’e ba susesu hanesan sira-nian rasik. Ho ida ne’e, hanesan Calasanz, ita mos fiar katak “labarik sira, hahuu husi infánsia, simu hanorin iha piadade no letra karik, la iha dúvida, sira-nia moris aban-bainrua sei sai nabilan.” Ita reza ba labarik ida-idak atu Maromak fo ba sira spíritu matenek no badinas. Ita mos kontinua reza ba vokasaun atu Maromak haruka serbisu nain sira ba ninia to’os. Buat hotu ba Maromak nia glória no ba maluk sira nia di’ak.
Recent Comments